Tecendo Redes: Migración, Arte e Lugo
Tecendo Redes: Migración, Arte e Lugo é unha exposición promovida pola Asociación Rioplatenses, coa colaboración da Rede Museística Provincial de Lugo, que reúne o traballo de sete artistas de diferentes procedencias para explorar, desde a creación contemporánea, cuestións como a memoria, os desprazamentos, a identidade ou a pertenza.
As obras que conforman este percorrido non buscan ofrecer un relato único sobre a migración, senón abrir un espazo onde conviven experiencias, biografías e formas diversas de habitar o mundo. A través da arte, a exposición pon en relación historias persoais e colectivas, revelando os vínculos que se tecen entre xentes, territorios e culturas.
O Museo da Migración incorpora esta exposición ás súas Salas para preservar e prolongar no tempo un proxecto expositivo que segue a interpelar a sociedade. A súa incorporación ao ámbito dixital abre un novo espazo de acceso, encontro e diálogo, permitindo que a mostra continúe xerando lecturas, conexións e conversacións máis alá do seu contexto expositivo orixinal.